Dünyaca məşhur aktrisa Ancelina Coli Amerikada bir moda jurnalına verdiyi müsahibəsində aktyor Bred Pittlə boşanmalarına dair gizli qalan məqamlardan danışıb. Coli "Uşaqlarımdan gizli duşda ağlayırdım" deyərək ayrılığın çətin tərəflərini bildirib.
GoldNews.Az xəbər verir ki, cütlük ötən ilin sentyabr ayında boşanıb. Ayrılığın üzərindən 10 ay keçməsinə baxmayaraq, Coli bu haqda ilk dəfə danışıb. Aktrisa bildirib ki, onlar arasında ilk dəfə soyuq küləklər 2016-cı ildə "First They Killed My Father" filmi çəkilərkən olub: "Bu mənim həyatımın ən çətin anları idi. Sadəcə gündəlik qayğılardan danışmaq üçün bir yerə gələn insanlar kimi idik".
Coli sözlərinə belə davam edib: "Belə vəziyyətlərdə uşaqların gözü önündə deyil də, duşda ağlamağın çox önəmli olduğunu düşünürəm. Siz əmin olmasanız belə onların hər şeyin yaxşı olacağına inanmaları çox mühimdir".
Ancelina bildirib ki, Pittlə ayrıldıqdan sonra özünü ev işlərinə verib: "Yeni bir evə köçmək mən və uşaqlarım üçün çox böyük bir addım idi. Hamımız hazırda ailəmizi bir yerdə saxlamaq üçün əlimizdən gələni edirik. Ayrılığın əziyyətinin altından çıxmaq üçün özümü ev işlərinə yönləndirmişəm, uşaqlarımla vaxt keçirdirəm. İtlərə baxdım, boşqab yudum və uşaqlarıma yatmamışdan öncə nağıl danışdım".