Bir neçə gün öncə sosial şəbəkələrdə zəif eşidən bir qocanın (Elşən Allahyarov adlı şəxs olduğu güman edilir) ələ salındığı video yayılmışdı. Videoda Saatlı Rayon Məşğulluq İdarəsinin rəisi olduğu deyilən şəxsin ahıl kişiyə nalayiq sözlər dediyi, onu ələ saldığı görülür.
Sosial şəbəkələrdə videonu çəkən və qocanı ələ salan şəxsin Saatlı Rayon Məşğulluq İdarəsinin rəisi Bayram Mikayılov olduğu deyilirdi.
GoldNews.Az xəbər verir ki, A24.Az məsələni dəqiqləşdirmək üçün Bayram Mikayılov ilə əlaqə saxlayıb. Məşğulluq İdarəsinin rəisi bildirib ki, sözügedən videodan xəbəri var. Lakin nə oradakı yaşlı kişini, nə də onunla danışan şəxsi tanıyır.
“Bu mənim keçmiş həyat yoldaşımın işləridir. Hazırda boşanma işimiz məhkəmədədir. Onlar bütün gücünü bu işə səfərbər ediblər ki, işi geri götürüm. Onlar məni şərləmək istyirlər”.
Bayram Mikayılov əlavə etdi ki, onu şantaj edənlərin arasında keçmiş həyat yoldaşının əmisi, Laçın Rayon İcra Hakimiyyətinin sabiq başçısı Ramiz Cəbrayılov da var.
“Mənə qarşı qarayaxmada Laçın rayonunun keçmiş icra başçısı Ramiz Cəbrayılovun da əli var. İndi də məni maşınımın qarşısına adam atmaqla hədələyirlər”.
Bayram Mikayılov eyni zamanda artıq dəqiqləşdirmədən onun adını bu məsələdə hallandıran saytı məhkəməyə verdiyini dedi: “Artıq Yasamal məhkəməsində həmin saytın işinə də baxılır”.