GoldNews.Az olaraq 2017-ci ilin yekunları silsiləsindən növbəti yazımızı təqdim edirik. Bu dəfəki hesabatımız cari ildə ölkədə baş verən ən dəhşətli yol qəzaları ilə bağlıdır.

Bakı-Sumqayıt yolunda dəhşətli yol-nəqliyyat hadisəsi baş verib.

Şosenin Masazır dairəsindəki körpünün üstündə "Ford-Tranzit” markalı sərnişin mikroavtobusu yolun kənarındakı maneəyə çırpılıb. Hadisə zamanı avtobusda ümumilikdə 28 nəfər olub. Onlardan 5-i dünyasının dəyişib. Qəzada yaralanan 17 nəfər Sumqayıt, 4 nəfər isə Kliniki tibbi mərkəzə yerləşdirilib. İki nəfərin vəziyyəti ağır olaraq qalır. Sumqayıt xəstəxanasına yerləşdirilən yaralılardan 3-nə travmotologiya, 6-na neyrocərrahiyə, 2-nə reanimasiya, 3-nə cərrahiyədə, 2-nə isə ambulator yardım göstərilib. Xəstəxanalara Səhiyyə Nazirliyinin qabaqcıl mütəxəssislərinin əməkdaşları gediblər, yararlıların vəziyyəti ilə yaxından tanış olub, lazımi yardım göstərirlər.

Qeyd edək ki, ölənlər Sumqayıt Dövlət Universitetinin tələbələri olub.

Azərbaycanda dəhşətli qəza: 7 ölü

İsmayıllı rayonunda baş vermiş dəhşətli yol qəzasında ölən 7 nəfərin şəxsiyyəti dəqiqləşdirilib.

Hüquq-mühafizə orqanlarından əldə etdiyi məlumata görə, Muğanlı-Qəbələ avtomobil yolunun Topçu kəndindən keçən hissəsində Şəki rayon sakini, 53 yaşlı Abbasov Rahim Sərkər oğlunun idarə etdiyi 99-DF-907 dövlət nömrə nişanlı “Opel Zafira” ilə Böyük Britaniya vətəndaşı, 1965-ci il təvəllüdlü İnqland Vilyam Henrinin sürdüyü 99-AL-238 dövlət nömrə nişanlı “Toyota Prado”nun toqquşması nəticəsində ölən 7 nəfərdən 6-sı iki ailənin üzvü olub.

Belə ki, toqquşma nəticəsində “Opel”in sürücüsü ilə yanaşı, sərnişinləri 1978-ci il təvəllüdlü Bayramov Ruzigar Məmməd oğlu, onun 14 yaşlı oğlu Sahib Bayramov, 11 yaşlı oğlu Cavid Bayramov, eləcə də, 1977-ci il təvəllüdlü Kərimov Yaşar Camal oğlu, onun 19 yaşlı qızı Rufanə Kərimli və 16 yaşlı qızı Turanə Kərimzadə vəfat edib.

Hadisəyə yolun sürüşkən olması şəraitində sürət həddinin düzgün seçilməməsinin səbəb olduğu bildirilir.

Faktla bağlı baş Dövlət Yol Polisi İdarəsinin istintaq və təhqiqat şöbəsi tərəfindən araşdırma aparılır.

Bakıda dəhşətli qəza - "Gelandewagen"də 3 nəfər yandı

Heydər Əliyev prospektində dəhşətli qəza baş verib. "Mercedes Gelandewagen" markalı maşın idarəetməni itirərək, işıq dirəyinə çırpılıb. Qəfildən alışan avtomobil qapılarını açmaq mümkün olmadığından salonda olan 3 nəfər yanaraq,dünyasını dəyişib. Qəza zamanı “Gelandewagen” avtomobilində həlak olan şəxslərdən biri Baş Nazirin müavini Əli Həsənovun nəvəsi Nail Allahverdiyevin sürücüsü olub.

APA-nın hadisə yerində olan əməkdaşının xəbərinə görə, “Mercedes Gelandewagen” markalı avtomobil paytaxtın Heydər Əliyev prospekti ilə hərəkətdə olarkən idarəetməni itirib və “VAZ 21015” markalı avtomobilə arxadan çırpılıb. Daha sonra “Mercedes Gelandewagen” yolun kənarındakı maneəni aşaraq köməkçi yola keçib və yanmağa başlayıb. Qəza nəticəsində “Mercedes Gelandewagen”in sürücüsü də daxil olmaqla, iki nəfər ölüb. Qəza zamanı piyadanın da vurulduğu bildirilir.

Hadisə yerinə yanğınsöndürənlər və polis əməkdaşları cəlb olunub.

Sözügedən “Mercedes Galendewagen” avtomobil 10 PP 203 dövlət nömrə nişanlı olub və həmin vaxt baş nazirin müavini Əli Həsənovun nəvəsi Nail Allahverdiyev də maşında olub. O, qəza nəticəsində ağır bədən xəsarətləri alıb. Hadisə baş verən kimi Həsənovun nəvəsi maşından təcili çıxarılaraq aparılıb.

Azərbaycanda dəhşətli qəza: meyitlər yerə səpələndi

Sabirabadda Şəhriyar kəndi ərazisində ağır yol qəzası baş verib. "Kamaz" markalı yük avtomobili ilə "Mersedes" markalı avtomobil toqquşub. Hadisə nəticəsində 4 nəfər ölüb, 2 nəfər yaralanıb. Yaralılar Şirvan Şəhər Mərkəzi Xəstəxanasına yerləşdirilib. Hadisə nəticəsində ağır xəsarət almış Etibar Məzahir oğlu Eyvazlı dünyasını dəyişib. Bundan başqa, Füzuli rayon sakinləri - 22 yaşlı Araz Mehdi oğlu Xənimli, 21 yaşlı Etibar Məzahir oğlu Eyvazlı xəsarət alıb. Daha sonra ı Eyvazlı Etibar Məzahir oğlu xəstəxanada dünyasını dəyişib. Xənimli Araz Mehdi oğlunun vəziyyətinin kritik olduğu bildirilir. Məlumata görə, qəza dumanlı hava səbəbindən baş verib. Avtomobillərin toqquşması nəticəsində hadisə yerində ölən üç nəfərin meyiti FHN-nin xilasediciləri tərəfindən çıxarılıb.

Faktla bağlı araşdırma aparılır.

Bakıda dəhşətli qəza: Avtomobil iki yerə bölündü – FOTO

Bakıda ağır yol qəzası baş verib. Paytaxtın Ziya Bünyadov prospektində “Mercedes” markalı minik avtomobili işıq dirəyinə çırpılaraq parçalanıb. Hadisə nəticəsində sürücü dünyasını dəyişib. NAXÇIVANDA DƏHŞƏTLİ QƏZA – Nazirin qardaşı oğlu və məşhur polkovnik vəfat etdi

Naxçıvan MR Kəngərli rayonu ərazisində dəhşətli yol qəzası baş verib. Bizimyol.info xəbər verir ki, ötən gecə saat 22:00 radələrində Kəngərli rayonunda (Qıvraq düzü deyilən ərazidə) Nuran Ələkbərova məxsus “Mersedes” markalı 68-BC-222 dövlət nömrə nişanlı avtomobillə, N saylı hərbi hissənin yüksək rütbəli zabitinin idarə etdiyi, nömrəsi hələki bəlli olmayan minik avtomobilləri toqquşub.

Nəticədə “Mersedes” markalı avtomobildə olan Naxçıvan DİN-nin əməkdaşı Nuran Ələkbərov, onun həyat yoldaşı və azyaşlı uşağı hadisə yerində həlak olub. Digər avtomobildə olan N saylı hərbi hissənin Nizami Hissə rəisi, Polkovnik Mirnemət Eminov da hadisə yerində vəfat edib. Dərhal hadisə yerinə yüksək rütbəli məmurlar, hüquq mühafizə orqanlarının əməkdaşları gəliblər. Faktla bağlı araşdırma aparılır.

İlkin məlumata görə, hadisə pis, yağışlı hava şəraiti üzündən baş verib.

Qeyd edək ki, “Mersedes” markalı avtomobili idarə edən Nuran Ələkbərov Naxçıvan MR Dövlət Təhlükəsizlik Xidmətinin rəisi, general Fazil Ələkbərovun qardaşı oğludur. Polkovnik Eminov isə Naxçıvanda kifayət qədər məşhur bir hərbçi idi.

Yevlaxda dəhşətli qəza: 6 ölü Yevlaxın Tanrıqulular kəndində 5 nəfərin ölümü, 1 nəfərin ağır yaralanması ilə nəticələnən yol qəzası baş verib.

APA-nın Qarabağ bürosunun xəbərinə görə, Yevlax rayon Salahlı kənd sakini, 1963-cü il təvəllüdlü Səfərov Ziyad Surxay oğlunun idarə etdiyi 20 CF 226 dövlət nömrə nişanlı VAZ 2107 markalı minik maşını Tərtərin Cəmilli kənd sakini, 1992-ci il təvəllüdlü Zülqədarlı Zülqədar Üzeyir oğlunun idarə etdiyi 50 CE 046 nömrə nişanlı VAZ21015 markalı avtomobillə toqquşub. Nəticədə hər iki minik maşınının sürücüsü və daha üç nəfər - VAZ-2107-nin sərnişini, Kəlbəcər rayonundan məcburi köçkün, 1961-ci il təvəllüdlü Həşimov İlya Yunis oğlu, digər maşındakı sərnişinlər, Mingəçevir şəhər sakini, 1988-ci ildə anadan olmuş Zeynalov Pərviz Fərəc oğlu və 1993-cü il təvəllüdlü Allahverdiyev Zahir Həsən oğlu hadisə yerində keçiniblər. VAZ 2107-də olan digər sərnişin, Kəlbəcər rayonundan məcburi köçkün Alışanlı Tural Əliyar oğlu ağır bədən xəsarətləri ilə Mingəçevir şəhər Xəstəxanasına çatdırılıb. Həkimlər onun vəziyyətinin ağır olduğunu bildirir. Faktla bağlı Yevlax Rayon polis Şöbəsində araşdırma aparılır.

Azərbaycanda dəhşətli qəza - Məşhur şirkətin 4 qadın işçisi öldü

Yeni inşa olunan Ələt-Astara avtomobil yolunda “Mercedes” və “VAZ 2106” markalı iki avtomobilin toqquşması nəticəsində 4 qadın hadisə yerində ölüb, 3 nəfər xəsarət alıb. “Qafqazinfo”nun APA-ya istinadən xəbərinə görə, hadisə Ələt-Astara yolunun Salyan rayonu ərazisindən keçən hissəsində baş verib. Məlumata görə, hadisə yeni inşa olunan magıstral yolun istismara verilməyən hissəsində baş verib. Xəsarət alanlardan iki nəfərin kimliyi bəlli olub.

Salyan xəstəxanasına yerləşdirilən yaralılar “Mercedes”in sərnişini Cəlilabad sakini 1990-cı il təvəllüdlü Əzimov Fərid Habil oğlu və “VAZ 2106” markalı avtomobilin sərnişini Sabirabad sakini 27 yaşlı Hüseynov Babək Xanəhməd oğludur. Qəzada həlak olan hər 4 qadın Salyan rayon sakinidir. Onlar Ələt-Astara avtomobil yolunu çəkən EVRASCON şirkətinin düşərgəsindəki yeməkxanada aşpaz işləyirlərmiş.

Bakı-Qazax yolunda dəhşətli qəza — Beş tələbə öldü

Hadisə saat 15:00 radələrində Bakı-Qazax magistral yolunun Kürdəmir rayonu ərazisindən keçən hissəsində baş verib. Avtomobilin idarəetmədən çıxaraq yol kənarına aşması nəticəsində ilkin məlumatlara görə, 5 nəfər ölüb. “Hundai” markalı 90-LD-773 dövlət nömrə nişanlı minik avtomobilinin yolun kənarına aşması nəticəsində ölənlərdən birinin adı məlum olub.

Həmin şəxs avtomobilin sürücüsü 1998-ci il təvəllüdlü Əmraslanlı Amraslan Müşfiq oğludur.

Digərlərinin şəxsiyyəti müəyyənləşdirilir.

Qəza nəticəsində ölənlərin meyitləri Şirvan şəhər məhkəmə tibbi-ekspertizasına aparılıb.

Onların İmişli rayon sakinləri olduğu bildirilir. Ölənlərin hamısı tələbədir.