Hesablama Palatası Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu üzrə dövlət maliyyə-büdcə nəzarətinin həyata keçirilməsi məqsədi ilə aparılan audit zamanı artıq pensiya ödənişlərinin olduğunu aşkarlayıb.

Trend-in məlumatına görə, 2017-ci il üzrə aparılan auditin nəticələrinə əsasən, fondun Gəncə şəhər Kəpəz rayonu, Quba, Salyan rayonları və Mingəçevir şəhər şöbələrində məcburi dövlət sığorta haqları üzrə proqnozlar tam icra edilməyib, əmək pensiyalarının təyin edilməsi üçün sənədlərin qəbulu, baxılması və pensiya məbləğinin hesablanması prosesində qanunvericiliyin tələblərinə tam əməl olunmayıb.

Əlilliyə görə pensiyaşçıların 2017-ci ilin 1 iyul tarixinədək olan dövrdə işləyib-işləməməsi nəzarətdə saxlanılmayıb. Nəticədə işləməyən əlil kimi əmək pensiyasını tam məbləğdə alan, lakin müəssisə və təşkilatlarda çalışan muzdlu işçilərə, habelə aktiv sahibkarlıq fəaliyyətilə məşğul olan fiziki şəxslərə ümumilikdə 203134, 5 manat məbləğində artıq pensiya ödənilib.

Uşaqlarının sağlamlıq imkanlarının məhdudluğuna görə sosial müavinət və eyni zamanda əlilliyə görə pensiya alan bir sıra şəxslərin pensiya məbləğinin üzərinə əmək qabiliyyəti olmayan uşaqlarına görə ailə əlavəsi də hesablanıb. Nəticədə ümumilikdə 22,9 min manat məbləğundə artıq pensiya ödənişi həyata keçirilib.

Bundan əlavə, əmək pensiyalarının baza məlumatları ilə pensiyaçıların plastik kart hesabları üzrə məlumatların üzləşdirilməsi nəticəsində uzun müddət ərzində dövriyyəsi olmayan və ya hesabdan vəsait çıxarılmayan plastik kart hesablarından ümumilikdə 73,3 min manat vəsait qalığının olduğu aşkarlanıb.