Bir neçə gün bundan əvvəl paytaxtda müşahidə olunan yağışlı hava şəraiti şəhərdə infrastruktura ciddi ziyan vurub. Eyni zamanda, yağışlı hava şəraitindən sonra yağış sularının yol təsərrüfatına da vurduğu zərərlər aşkarlanıb. Belə ki, yağışlı havadan sonra paytaxt yollarında işıqforların fəaliyyətində yaranan problemlərin aradan qaldırılması üçün yalnız sonradan tədbir görülür. Bu gün də yağıntılar nəticəsində Bakının Səməd Vurğun küçəsində yol çöküb, həmin ərazidə 60 metr uzunluğu, 3 metr enində sürüşmə qeydə alınıb.

Müvafiq qurumlar tərəfindən təbiət hadisələrinin infrastruktura zərərsiz ötüşməsi üçün profilaktik tədbirlərin həyata keçirildiyi bildirilsə də, illərdir ki, nəticəsiz qalıb.

Bu barədə A24.Az-a öz fikirlərini bölüşən Milli Məclisin deputatı Fazil Mustafa deyib ki, Azərbaycanda heç bir sahədə profilaktik tədbirlər görülmür. Ona görə də yağış yağan kimi şəhərdə problemlər yaranmağa başlayır:

“Profilaktika bizdə hansı sahədə var ki? Heç bir sahədə olmadığı kimi, bu sahədə də yoxdur. Ona görə də bu məsələdə baş verən hallar gözələniləndir. Başqa cür də gözləmirəm. Keçən dəfə yağış yağanda hamımız gördük ki, şəhər iflic vəziyyətə düşdü. Eyni hadisələr Bakıda qış fəslində də davam edəcək. Bu kimi hallar təkrarlanacaq. Ona görə də bu kimi məsələlərdə təəccüblü heç nə yoxdur”.

F.Mustafa qeyd edib ki, bununla bağlı ölkə başçısı dəfələrlə tapşırıqlar, göstərişlər versə də, məsələ həllini tapmır:

“Çünki bu istiqamətdə nəzarət mexanizmi kifayət qədər yetərli deyil. Ona görə də bəzi məmurlar öz bildiyini edir. İşlərini bildikləri kimi – yarıtmaz formada yerinə yetirirlər. Biz təbiət hadisələrinin qarşısının alınması üçün hazırlaşmırıq. Yalnız hadisə baş verəndə, problemlərin aradan qaldırılması barədə düşünürük”.