Məşhur futbolçu "Facebook" səhifəsindən karyerasına son verdiyini bildirib.

GoldNews.Az xəbər verir ki, "Leicester City"nin Premyer Liqa çempionu olmasında böyük payı olan 27 yaşlı Riyad Mahrezden dünən gecə şok açıqlama gəlib.

Mahrez rəsmi "Facebook" səhifəsində futbolu buraxma qərarı verdiyini açıqlayıb. Amma digər sosial media hesablarından hər hansı bir açıqlama gəlmədiyinə görə, futbolçunun hesabının oğurlandığı iddiaları gündəmə gəlib. Diqqət çəkən detal isə paylaşılan açıqlamanın üzərindən saatlar keçməsinə baxmayaraq, onun silinməməsidir.

Açıqlamada: "bir çox həkimdən fikir aldıqdan sonra futbolu buraxmağa qərar verdim. Futbolçu kimi vaxtımı tamamladım, bir neçə şey demək istəyirəm. Bu şəhərdə mənə yaxşı davranan və dəstək verən hər kəsə təşəkkür etmək istəyirəm. Hər zaman qəlbimdə olacaqsınız" cümlələri yer alıb.