Əsl sənətdən fərqli olaraq şou-biznes bu sahədə çalışan insanlardan daimi dinamiklik tələb edir. Bu sahənin şou və biznes tərəflərini elə idarə etmək lazımdır ki, həm populyarlığını itirməyəsən, həm də adını. Təsadüfi deyil ki, bu və başqa səbəblərdən Azərbaycanda bir neçə şəxs populyarlıqlarının zirvəsinə çatdıqları halda gözlənilmədən gündəmdən düşüb, beləcə hər kəsin yaddaşından silinib.

GoldNews.az bir zamanlar Azərbaycanda məşhur olmuş indi isə əvvəlki populyarlığından əsər əlamət qalmayan müğənniləri təqdim edir:

İlqar Xəyal

Çağdaş Azərbaycan musiqisində özünəməxsus yeri olan, lakin son illər müğənni kimi fəaliyyəti görünməyən İlqar Xəyal “Sarı güllər”, “Tufanla oynama” və digər məşhur mahnıların müəllifidir. O, həm də “Karvan” qrupu ilə yəqin ki, uzun illər yaddaşlarda qalacaq.

 

“Aşıqlar” qrupu 

“Aşıqlar” qrupu — 1973-cü ilin avqust ayında Elxan Şıxəliyev tərəfindən yaradılıb. Qarabağ münaqişəsinin başlanmasından sonra “Aşıqlar” – 1989-cu ildə fəaliyyətini dayandırır. Amma Elxan Şıxəliyev 1997-ci ildə “Aşıqlar” qrupunu yenidən bərpa etmək qərarına gəlir. Əvvəlki üzvlər və bir neçə yeni musiqiçi ilə yenidən bərpa olunan qrup 2001 və 2002-ci illərdə Heydər Əliyev Sarayında konsert proqramı ilə çıxış edir. Lakin bundan sonra yavaş-yavaş fəaliyyəti öləziyən qrup son illər demək olar ki, meydanda yoxdur.

Samir Bağırov

Səhnəyə ilk addımını 30 il əvvəl atan Samir Bağırov ölkə və dünya miqyaslı bir neçə müsabiqənin qalibidir. Azərbaycanın müstəqillik illərinin ən tanınmış müğənnilərindən olan Samir Bağırov fərdi imicinə görə ən çox tənqid olunan kişi müğənnilərdən oldu. O, son 10 ildə şou-biznesdə demək olar ki, gözə dəymir.

  

İlahə Fəda


Bacısı Fədayə Laçınla paralel bir zamanlar məşhurluq qazanan İlahə Fəda sonradan efirlərdə və şou-biznes aləmində gözə dəymədi.

Tağı Salehoğlu

90-cı illərin sonu və 2000-ci illərin əvvəllərində populyarlığının pik nöqtəsinə çatan Tağı Salehoğlu bu gün fəaliyyətini davam etdirsə də, əvvəlki mövqeyini itirdiyi açıq görünür.

 

İradə Qəmli

İnsanların musiqiləri daha çox “kaset”lərdə dinlədiyi vaxtlara təsadüf edən müğənnilərdən biri də İradə Qəmli idi. “Ney səsiyəm”, “Ana muğamı” ilə demək olar ki,  hər kəsin evinə ayaq açan müğənninin görmə problemi olduğu deyilirdi. 2000-ci illərin əvvəllərində populyarlıq qazanan İradə Qəmlinin şöhrəti təxminən 5 il sürdü. Ardınca o da parıltısını itirən ulduzlar sırasına düşdü. Müəğnninin 4 il öncə dünyasını dəyişdiyi deyilir.

 

 

Ruhi

2007-ci ildə səhnəyə gələn Ruhi qısa müddətdə bir neçə mahnısı ilə Azərbaycanda yetərincə məşhurluq qazandı. Bir neçə dəb və televiziya layihəsinin müəllifi olan müğənni müəmmalı şəkildə şou-biznesdən uzaqlaşıb.

 

 

Rəhman Basılmaz

Meyxana aləmində bu gün demək olar ki, gözə dəyməyən bir şəxs var – Rəhman Basılmaz var. 2000-ci illərin əvvəllərində o da öz sahəsində ən öndə gedənlərdən idi. Ardıcıl çıxardığı iki “kaset”lə meyxana dinləyicilərin sevgisini qazanan Rəhman sonralar daha ciddi müstəvi əldə edən meyxana aləmində məşhurluğunu qoruyub saxlaya bilmədi.