Azərbaycanda hazırlanan əksər reklam çarxlarının lazımı yöndən diqqət çəkməməsi istehsalçılarda daha aşağılayıcı, əhalini qıcıqlandıran cəhdlərlə gündəmə gəlmək istəyi yaradır. Problemin kökündə duran əsas səbəb bacarıqsızlıq olduğundan çarx istehsalçıları əksər hallarda ciddi nöqsanlara yol verir. Bu yanlışlar arasında ən yolverilməzi milli atributlar, əhalinin aşağılanması, etik vəzifələrin pozulması və başqa qüsurlardır.

GoldNews.Az xəbər verir ki, Azərbaycanda ən böyük rəsmi distribüterlərdən olan "İrşad" Electronicsin Çin istehsalı olan "Xiaomi" telefonunun reklam çarxında azərbaycanlı obrazı aşağılanır. "Qaqli" adı ilə təqdim olunan şəxs xarici ölkə vətəndaşı ilə qarşılaşdırıldığından burada daha çox ölkəsinin obrazı kimi diqqət çəkir. Reklamda azərbaycanlı obrazı satış məntəqəsinə daxil olan kimi mağazadakılar ondan çəkinməyə başlayır. Həmin obraz telefon alaraq mağazanı tərk edən qıyıqgözlü (Brüs Li) ilə toqquşur. Problem burasındadır ki, toqquşmaya səbəb olan azərbaycanlının əvəzinə qarşısındakı ondan üzr istəyir. Ardınca azərbaycanlı heç bir məntiqə və etik qaydaya sığmayan bir hərəkət edir; xarici vətəndaşın əlindəki telefonu məcbur almaq istəyir. Bu vaxt qıyıqgözlü onu itələyir. Cılız, ilk baxışdan narkoman təəssüratı yaradan obraz az əvvəlki iddiasının əksinə, gülünc vəziyyətə düşür. Ardınca Brüs Li öz milli döyüş alətləri olan "nimçaqa"nı götürür. Azərbaycanlı obrazı kimi təqdim edilən "Qaqli" isə cibindən təsbeh çıxarır. Bir tərəfdə sağlam bədənli, mədəni, güləriz qıyıqgözlü, digər tərəfdə isə üz-gözünü səliqəsiz şəkildə tük basmış, cılız, əlitəsbehli, mədəniyyətsiz azərbaycanlı.

Əyindəki paltar, başındakı papaq, mimikaları və danışıqları ilə cəmiyyətin arzuolunmaz tipini nümayiş etdirən bu şəxs təəssüf ki, ya düşünülmüş şəkildə, ya da bilməyərəkdən azərbaycanlı obrazını sərgiləyir. Eyni zamanda, bu obraz nümunə kimi göstərilir və sona qədər deşifrə olunmur. 

Təəsüf ki, mədəniyyət layihələrində, təhsil ocaqlarında gənclərin normal fərd kimi yetişməsi üçün təqdim olunan normativlər əksər media orqanlarında, reklam çarxlarında məhv edilir. Bu tip şəxslərin ictimailəşdirilməsi, onların normal cəmiyyət üzvü kimi təqdim edilməsi şəhərin arxa küçələrində sayı gündən-günə artan bu tip arzuolunmaz obrazlara təkan verir.